Dieser Beitrag wurde von Dominik Schork verfasst, Kundeninformationsmanager der rnv, der des Kurpfälzischen bei Bedarf überaus mächtig ist.
Äfach ä schääni Schprooch
Kennsch des, hea? Do hoggsch gemiedlich mit deine Leit zamme, hosch Schbass, ä gudi Zeit un uf der anna Seit vum Disch gugge disch die Leit o un du wesch eigendlich ned warum? Vielleicht liegts jo an doim Aussehe? Hosch vielleicht Essensreschde im Gsichd hänge? Nä, alles falsch. Nochdem freundlich frogsch, warum die Leit so gugge, sache sie da, dass du komisch babbelsch.
Komisch babble? Rischdisch, es liegd on deim Dialekt, der fa manche Leit vielleicht ah bissel olwer klingt. Un warum is des unser heidisches Thema? Ganz äfach. Bass emol uff, am 21. Februar is immer Dag des Dialekts in unsarm schäne Land. Do kannsch äfach mol ubeschwert doi Lapp ufmache un so babble wie willsch, ohne dass änner dawedda gehe dud. Wesch wie isch mään? Alla hopp, hogg die jetzat uf doin Bobbes un les das schää durch, was ma uffgschriwwe hawwe. Ned dass a noch in ä Fettnäpfsche noidabbe dusch, fallsemol in unsrer schäni Kurpalz unnawegs bischd.
Mir Kurpälzer hawwe schun ä leicht komischi Art zu schwätze fa Leit, die vun außerhalb kumme. Awwa is des ned schä, wenn disch kääner verschdehe dud? Hajo des glaabsch awwa! Unneroinanner verschdehe ma uns jo schließlich subba. Sobald awwa äner Hochdeitsch oder än annere Dialekt schwätzt, wärds fa denjenische schwierisch un du wärsch mit große Aache ohgeguggt.
Die Worschd, die Dudd, da Pärsching, da Woi
Awwa woher kummd eigentlich unser schäni Art zu babble? Wenn guugle dusch, wärsch rausfinne, dass es schun ä ganzi weil her is. Des bsonnere an unserm schäne kurpälzer Dialekt (Du dusch richtisch lese, ma spreche kurpälzisch un ned badisch! Un mid de Schwowe hawwe ma schun garnix zu due! 😉) is, dass jeder Ord ä anneri Ausschbroch hot un ma uns trotzdäm immer verschdehe due. Im Norde vun Monnem sachd ma Monnem. Im Süde vun Mannem hingege sachd ma Mannem. Do kummd än Auswerdische schun ganz schä aus da Rei. In Ludwigshafe, uff der onner Seit vum Roi – im Land vum Frizz Walder, der Schobbe un Dubbe, wo die Leit manchmol Dorschd hawwe, schwätzt ma wieder was anneres. Un a in Heidelberg werre manche Sache onnerschda ausgschbroche. Wesch was ma mäne?
Än Bembel zum Beispiel is faschd iwwerall ä Gfäss fa de Ebbelwoi. In Heidelberg isses awwa die Bembl, also die Stroßebahn. Do kanns schunmol bassiere, dass die Leit komisch gugge, wenn beispielsweis mit da Ögg im Rhoi-Neggar-Kreis unnawegs bisch oder mit doim Bobbes zur Erwäd fährsch. Wenn a noch die groß Rund fahre dusch, wärsch ned nur durch Monnem, Mannem un Heidelberg fahre. Du kummsch a in Seggene, Värne, Woinem, Schriese un vielleicht in Grosaase, also an da Bergschdroß, vorbei. Was fa ä geknoddel fa än Auswärdische oder? Falls du a ääner vun dere Sord bisch: Immer schää Uffbasse, was babble dusch. Mir Schlabbgosche werre nämlich soford rausfinne, dass du ned vun Do bisch! Brauchsch awwa a ned groine, kann jo schließlich ned jeder vun Do soi!
Un weil uns des Gebabbel un die Färz so än große Schbass mache un ma äfach Stolz uf unsa schäni Ausschbroch sin, hawwe ma uns was ganz bsonnares fa Eich iwerlegt. Unsern Linienetzblan Schien hot ganz bletzlich eigeardische Name oder was määntn ihr?