Ich bin de Ernst und des is moin Ernscht
Ich muss do mol widder ebbes loswerre.
Ich mähn, bald is jo widder Worschtmarkt un es werd ach endlich Zeit.
Zwe Johr hawwen mir jetzt sprichwörtlich uff´m Truckene g´sesse und bald könne mir dann endlich widder des größte Woifescht der Welt feiern.
Wonn sich am 9. September in Derkem die Pforte zum Worschtmarkt öffne, kumme Mensche aus aller Welt un es ist völlig egal, wo se herkumme, wie se aussehe odder an was sie glauben. Es is nur wichdisch warum mir alle zomme do sin, weil mir zomme Spaß hawwe un zusomme feiern wolle, wie es sich gehört und do is ewe kän Platz fer Mießepeter oder Stinkstiefel. Mir sin alle gleich und so gehe mir a mitnonner um. Mit Respekt un Toleronz.
Un wie kumme ner hier uff dde Worschtmarkt?
Ja, wie immer, det ich sage!
Mit unsre RHB, mit de Rhoi-Haardtbahn, mit de „Funkeschääs“, wie se, se frieher immer genennt henn.
Seit mehr als hunnnert Johr, verbindet die Linie 4 beziehungsweise 4A, wie se heit heeßt, die Mensche, die Region und insb´sondre Monnem sowie Ludwigshafe mit de Palz.
Un an denne zwä Worschtmmarktwochenende kumme mehr als ä halwi Million Mensche noch Derkem. Un wonn de misch frogscht, werd des Johr wahrschoinlich ä Rekordjohr, henn mir doch so long uff de Worschtmarkt verzischte misse, wege dem Corona do.
Un etwa 100.000 dodevu reise, wie es sich gehört, mit de RHB oa.
Des is iwwrischens sehr vernünftisch, denn außer dem Motto „Don´t Drink and Drive“ spart jo jeder, der soi Auto stehen lässt, zusätzlich CO2 oi und des dankt uns donn uns donn ach widder die Umwelt. Un wonn ämol än Schoppe zuviel getrinke hoscht, muscht ach net gloi doin Labbe bei de Bolizei abgewwe.
Außerdem entfällt die dabbisch Parkplatzsuch und mer steht net unnödisch im Stau.
So werd also jeder, der mit de „Bimmel“ fährt zum Cleverle un äm aktive Klimaschützer. So äfach is dess.
Was mir, ihr Leit, awwer besonders am Herze liegt is:
Nemmt immer Rücksicht uffenonner! Feiern macht nur Spaß, solang kenn onnere dodedrunner leide muss.
Seid äfach immer lieb zuenonner.
Helft eich, wenn’s mal bisschen wackelt beim Laufen.
Loss die sitze, die es nötischer henn.
Mach vor allem nix kabutt. De macht kenn Sinn un zum Schluss zahle die devor, die nix dodefor kenne.
Losst uns stattdesse liewer stolz druff soi, dass mir hier in de Pfalz Feschde mit dem rescht der Welt feiern, die die Leit do schon seit über dausend Johr feiern.
In dem Sinn saag isch:
Alla hopp, uff noch Derkem, bleibt sauwer und oastännisch und habt vor allem Spaß und ä gudi Zeit.
Mir sehe uns, eier Ernscht.